الدعم ورغيف العيش

الموضوع اللى هنتكلم فيه النهارده موضوع كبير اوى ولو قعدنا نتكلم فيه من هنا للسنه اللى جايه مش هيخلص وهنطلع منه مليون موضوع تانى ، لذلك انا هتكلم فيه باختصار شديد جدا.

الدعم

اظن ان الدعم ده الدوله عملته للناس الغلابه المطلق عليهم من قبل الدوله برده محدودى الدخل لكنهم فى الحقيقه هم معدومى الدخل مش موضوعنا حاليا.
تعالوا نسأل سؤال
هل هذا الدعم يصل اليهم فعلا ام لا؟
اظن كلنا عارفين الاجابه المنشوده من قبل الحكومه وهى طبعا بيوصل وكله تمام اما الحقيقه فكلنا عارفنها وعايشنها بس عارفين ليه الدعم مش بيوصل لاصحابه لغياب الرقابه لعدم مشغوليه المسؤلين بالكلام ده واهتمامهم بحاجات تانيه اما الناس مش مهم اللى ياكل ياكل ، واللى يسرق يسرق ، واللى ينام ينام ، واللى يعيش يعيش ، واللى يموت يموت ، يعنى عادى مافيش اى مشكله نهائى.
تعالوا بقى نتكلم عن رغيف العيش وهو مشكله من مشاكل الدعم الموجوده فى بلدنا.
تعالو كده ننزل على فرن عيش ونشوف الزحمه اللى عليه والمشاكل اللى بين الناس علشان العيش مع ان الفرن عنده حصه من الدقيق تكفى كل الناس دى بس لازم نصها يتباع فى السوق السوده امال صاحب الفرن يكسب منين؟.
بس نخلى بالنا ماينفعش نجيب برده العيب على اصحاب الافران لوحدهم او الحكومه لوحدها لأ واحنا كمان علينا جزء هو ان احنا مثلا فى مننا اللى بيشترى العيش وبكميات كبيره وليه؟ علشان يرميه للفراخ والبط واغلب اللى بيعملوا كده هم الريفيين لكن لو كل واحد بياخد عيش على اده كنا برده حلينا جزء من الازمه دى.
كل ده سببه غياب الرقابه وتعاون المسؤلين مع اصحاب الافران فى الخطأ علشان الكل يستفيد يعنى نفع واستنفع وطظ فى الغلبان.

فين الرقابه على الدعم اللى المفروض نعرف ونتابع بيها اذا كان الدعم بيوصل لاصحابه ولا لأ؟

رأيى بصراحه فى الموضوع ده ان الدعم ده يكون لطبقه معينه من الشعب اما باقى الطبقات فليس لها الحق فى الاستفاده منه لأنهم مش محتاجينه ولو على الحلول فى عندى بعض الاراء والحلول وهناقشها معاكم ان شاء الله فى المقال القادم ومنتظر ارائكم فى الموضوع وتعليقاتكم عليه.

حالم بالامل

الوظائف

ازيكوا ياشباب؟ .. عاملين ايه؟ .. النهارده هنكلم عن موضوع الوظايف اللى احنا مش لاقينها.

كام شاب ف بلدنا النهارده اتخرج من جامعته او خلص دراسته وقاعد ف بيتهم؟.

كام شاب ف بلدنا النهارده اتخرج من جامعته او خلص دراسته وقاعد على القهوه؟.

كام شاب ف بلدنا النهارده بيسرق وينصب ويغتصب وكل الحاجات اللى احنا بنسمع عنها دى؟.

اظن انهم كتير اوى .. ممكن يكونوا مليون .. ولا اتنين .. برجح انهم تلاته .. ده لو ماكانوش اكتر من كده بكتير.

ياترى ايه سبب كل ده؟ .. عارفين ايه السبب؟.

الوظايف

مافيش وظايف فى البلد او بمعنى اصح محجوزه للوسايط والمحاسيب .. اللى احنا مش منهم .. يعنى ابن الوزير والمحافظ والمدير

لكن الغلبان وابن الغفير .. ملوش نصيب ياعينى.

ممكن يروح يدور على اى شغلانه والسلام يعنى مثلا نقول: يبيع ترمس على الكورنيش ولا جرسون فى مطعم او كافتيريا او غيرها من الحاجات دى .. على الرغم من انه ممكن يكون معاه بكالوريوس محترم ويشتغل بيه فى مكان محترم زى هندسه او سياسه واقتصاد اوتجاره او ليسانس اداب وغيرهم كتير .. بس للاسف هو ده حال بلدنا متشقلب فى كل حاجه يعنى ممكن اللى متخرج من اداب يشتغل فى المحاسبه عادى جدا وبلاش نستغرب لان هو ده الواقع اللى احنا عايشين فيه للاسف .. ايه رأيكوا؟

حقكم ضايع؟ .. فى ناس واخده حقكم؟ .. حقكم راح بلاش؟ .. طب ليه ساكتين؟ .. خايفين؟ .. ولا بتقولوا: لا حياه لمن تنادى؟ .. طب ماتجرب تنادى الاول وبعدين قول لا حياه لمن تنادى .. تعالوا ننادى سوا ونجرب وندور على حقنا اللى ضايع ونبعد عن الواسطه والمحسوبيه قبل مانضيع اكتر من كده .. ولا انتوا ايه رأيكوا؟؟؟.

حالم بالامل

تعارف

انا ( حالم بالامل ) وحالم يعنى بحلم بس حلم مختلف شويه. بحلم بان سياسه بلدنا تختلف وتتغيير شويه.
بس على فكره انا مش ضد الحكومه ولا الريس ولا اى حاجه من كل ده. انا بس بحاول اناقش شويه قضايا مع الناس وفى النهايه عايز اوصل لحلول سياسيه ترضى جميع الاطراف حكومه وشعب عشان نقدر نعيش فى سلام داخل بلدنا بدل الحرب اللى انا شايفها دى.
بطلب من كل زائر او مشترك فى هذه المدونه ان يقرأ موضوعاتنا ويحاول تقديم حلول للمناقشه.

وتعالوا نبدأ عام جديد ونحلم سوا.
حالم بالامل